ZANÎNA DERBARÊ JÎNGEHÊ  

Wekî gelek pirsên civakî yên din, di raya giştî de giringîpêdayina pirsên jîngehê jî bi zanîna derbarê wan ve girêdayiye. Di gel vê, ji ber hin taybetmendiyên form û naveroka pirsên jîngehê di vî warî de îhtimala îhmalan û derengîmayinê jî zêdetir e. 

Em kurd jî pirsên warê jîngehê di jiyana rojane de ya bixwe dijîn yan jî dibihîsin. Lê bêrefleksbûyin yan jî di merheleya herî dawîn de giringiya pirsan ferqkirin carnan wusa dike ku êdî gelek tişt ji dest diçin.

Lê di gel hemû kêmasiyên xwe, di vî warî de jî pêşveçûneke berbiçav heye. Êdî mirov li hember bendavên nû yên li ser Feratê, Dîcleyê û Munzurê ne di sewiyeya rêlibergirtinê de be jî reaksiyonên xwe nîşan didin. Wexta mirov helwestên li hember bendavên wekî Keban, Karakaya û Ataturkê û yên îro bide berhev ferqiyeteke berbiçav derdikeve pêş.

Ger ev pêvajo bi hin gavên din bê bihêzkirin, ew dê li Kurdistanê ji bo zanîna derbarê jîngehê jî bibe zemîneke baş.

15.3.2001